DÖVLƏT DƏSTƏYİ VƏ ONUN İQTİSADİ ARTIMA TƏSİRİNİN QİYMƏTLƏNDİRİLMƏSİ: NƏZƏRİ METODOLOJİ ASPEKTLƏR

Xülasə

Məqalədə 2014-cü ildən etibarən Azərbaycan Respublikasında sənaye zonalarının yaradılması və inkişafı istiqamətində dövlətin həyata keçirdiyi investisiya təşviqi mexanizmləri və bu sahədə tətbiq edilən 
stimullaşdırıcı siyasətin mahiyyəti, məqsədləri və nəticələri geniş şəkildə araşdırılmışdır. Tədqiqatda sənaye zonalarının iqtisadiyyatın şaxələndirilməsi, regionlararası inkişaf fərqlərinin azaldılması və qeyri neft  sektorunun dayanıqlı artımında oynadığı rol vurğulanır. Araşdırma nəticəsində sənaye zonalarına 
göstərilən dövlət dəstəyinin mövcud formaları – vergi və gömrük güzəştləri, infrastruktur təminatı, maliyyə və institusional dəstək mexanizmləri – ümumiləşdirilmiş və sistemləşdirilərək təsnif edilmişdir. Dövlət 
dəstəyi, dövlət dəstəyi xərcləri, investisiya təşviqi və investisiya təşviqi xərcləri anlayışları üzrə müxtəlif nəzəri-metodoloji yanaşmalar müqayisəli şəkildə təhlil olunmuş, bu anlayışların iqtisadi məzmunu, qarşılıqlı əlaqələri və təsir sahələri izah edilmişdir. 
Məqalədə dövlət dəstəyinin iqtisadi artıma təsir mexanizmi konseptual və praktik baxımdan araşdırılmış, 
bu təsirin birbaşa və dolayı kanalları – investisiya aktivliyinin artması, sənaye istehsalının genişlənməsi, 
yeni iş yerlərinin yaradılması, texnoloji yenilənmə və məhsuldarlığın yüksəlməsi kimi istiqamətlərdə təhlil 
edilmişdir. Dövlət dəstəyinin effektivliyinin qiymətləndirilməsi üçün elmi-metodoloji yanaşma irəli 
sürülmüş, qiymətləndirmə meyarları və ölçülə bilən göstəricilər təklif olunmuşdur. Həmçinin empirik 
qiymətləndirmə üçün tələb olunan məlumatların strukturu, əhatə dairəsi və əsas mənbələri – dövlət statistika orqanları, maliyyə hesabatları, sənaye zonalarının idarəedici qurumlarının məlumat bazaları 
müəyyənləşdirilmişdir. Tədqiqatın nəticələri sənaye siyasətinin təkmilləşdirilməsi, dövlət resurslarının 
səmərəli bölgüsü və iqtisadi artımın davamlılığının təmin olunması baxımından mühüm elmi və praktik 
əhəmiyyət daşıyır.