BANKLARIN BİZNES KREDİTLƏRİNİN QEYRİ-NEFT-QAZ SEKTORUNDA İNVESTİSİYA FƏALLIĞINDA ROLUNUN QİYMƏTLƏNDİRİLMƏSİ

Xülasə

Təqdim edilən tədqiqat işi Azərbaycan Respublikası bank sektorunun maliyyə vasitəçiliyi fəaliyyətində 
aparıcı istiqamət olan kreditləşmənin, xüsusilə biznes kreditləşmənin, milli iqtisadiyyatın qeyri-neft və qaz 
sektorunda investisiya fəallığının təmin edilməsindəki rolunu hərtərəfli qiymətləndirməyə yönəlmişdir.  
Tədqiqatın əsas məqsədi bankların biznes kreditlərinin iqtisadiyyatın qeyri-neft-qaz seqmentində 
investisiya proseslərinə təsirini müəyyənləşdirmək və bu təsiri müxtəlif göstəricilər əsasında ölçməkdir. 
İşdə kredit qoyuluşlarının ÜDM-ə və qeyri-neft ÜDM-ə nisbəti, kreditlərin, xüsusilə biznes kreditlərinin 
bank aktivlərindəki payı, bank kreditlərinin faiz dərəcələri, bankların qeyri-faiz xərcləri, biznes kreditlərin 
bankların kredit portfelindəki payı, kapital xərcləri və dövriyyə vəsaitləri üzrə bölgüsü kimi parametrlər təhlil edilmişdir. Həmçinin tədqiqat biznes kreditlərin əsas kapitala investisiyalarda maliyyələşmə mənbəyi kimi funksiyasını, bankların kredit portfelində sənaye və istehsalın payını, eləcə də bankların istehlak kreditləri ilə idxal arasındakı əlaqəni araşdırır.  Aparılan analiz nəticəsində bank kreditləşməsinin qeyri-neft və qaz sektorunda investisiya fəallığının 
artırılmasında strateji əhəmiyyəti müəyyən edilmiş, kredit siyasətinin iqtisadiyyatın real sektoruna təsiri 
əyani şəkildə nümayiş etdirilmişdir. Bu nəticələr bank sektorunun inkişaf strategiyalarının 
formalaşdırılmasında və milli iqtisadiyyatın diversifikasiyası istiqamətində elmi əsas rolunu təmin edir, 
habelə gələcək tədqiqatlar üçün metodoloji baza yaradır.